पाँचौँ दिनमै २ लाख ३५ हजार रुपैयाँ चन्दा संकलन, भजन–कीर्तन, नृत्य र विविध मनोरञ्जनात्मक कार्यक्रमले भक्तिमय बन्दै पञ्चकन्या
बिर्तामोड, झापा। नेपालीहरूको महान् चाड बडादसैँको पूर्वसन्ध्यामा झापाको बिर्तामोड नगरपालिका–१ स्थित पञ्चकन्या टोलमा सामूहिक दुर्गा पूजा भव्य रूपमा सञ्चालन भइरहेको छ। पञ्चकन्या टोल विकास समिति र पञ्चकन्या कीर्तन मण्डलीको संयुक्त पहलमा गठित १३ सदस्यीय दुर्गा पूजा समितिले धार्मिक आस्था, सामाजिक सद्भाव र सांस्कृतिक एकतालाई जोड दिँदै पूजा आयोजना गरेको हो।
दुर्गा पूजा समितिका संयोजक तथा अध्यक्ष डा. प्रमोदकुमार राईका अनुसार पञ्चकन्या टोल विकास समितिले हरेक वर्ष आयोजना गर्दै आएको दुर्गा पूजालाई यस वर्ष पनि स्थानीयवासीको सक्रिय सहभागिता र सहयोगमा व्यवस्थित रूपमा सञ्चालन गरिएको छ। पूजाले धार्मिक परम्पराको संरक्षण गर्नुका साथै स्थानीय समुदायबीच आपसी सद्भाव, सहकार्य र एकताको भावना अभिवृद्धि गरिरहेको उहाँले बताउनुभयो।
पूजालाई धार्मिक अनुष्ठानमा मात्र सीमित नराखी सामाजिक योगदानको कदर गर्ने अवसरका रूपमा समेत विकास गरिएको छ। यसै क्रममा समितिले धार्मिक तथा सामाजिक क्षेत्रमा विशिष्ट योगदान पुर्याउने व्यक्तित्वहरूलाई सम्मान गर्दै आएको छ। त्यस्तै, पूजा अवधिभर हरेक सन्ध्याकालीन कार्यक्रममा चन्दादाता, समाजसेवी तथा विभिन्न क्षेत्रमा योगदान पुर्याउने व्यक्तित्वहरूलाई सम्मान गर्ने गरिएको समितिका सचिव हेमकुमार कडरियाले जानकारी दिनुभयो।
यसै क्रममा ज्येष्ठ नागरिक सम्मान कार्यक्रमअन्तर्गत ईश्वरदेवी संग्रौला, बलराम भट्टराई र कालिकादेवी पोखरेललाई सम्मान गरिएको छ। ज्येष्ठ नागरिक समाजका अनुभव, ज्ञान र संस्कारका महत्वपूर्ण प्रतिबिम्ब भएको उल्लेख गर्दै सचिव कडरियाले उहाँहरूको सम्मान गर्नु समाजप्रतिको कर्तव्य भएको बताउनुभयो। त्यसैगरी, धार्मिक क्षेत्रमा विशिष्ट योगदान पुर्याउनुभएका परशुराम शिवाकोटीलाई समेत सम्मान गरिएको उहाँले जानकारी दिनुभयो।
दुर्गा पूजा सञ्चालनका लागि करिब २ लाख ५० हजार रुपैयाँ आर्थिक बजेट आवश्यक पर्ने अनुमान गरिएको छ। पूजाको पाँचौँ दिनमा प्रवेश गरिरहँदा २ लाख ३५ हजार रुपैयाँ संकलन भइसकेको पूजा समितिकी आर्थिक संयोजक शर्मिला गौतमले बताउनुभयो। यसले स्थानीयवासी, चन्दादाता तथा शुभेच्छुकहरूको धार्मिक आस्था र सामूहिक सहभागितालाई प्रतिबिम्बित गरेको छ।
पूजालाई भव्य र सभ्य रूपमा सम्पन्न गर्न बिर्तामोड–१ का स्थानीयवासी, सामाजिक तथा धार्मिक व्यक्तित्वहरूले पुर्याएको सहयोगप्रति अध्यक्ष डा. राईले हार्दिक आभार व्यक्त गर्नुभएको छ। उहाँले सामूहिक प्रयास र सहयोगकै कारण धार्मिक तथा सांस्कृतिक कार्यक्रमलाई निरन्तरता दिन सम्भव भएको बताउनुभयो।
पूजालाई थप आकर्षक बनाउन हरेक साँझ भजन–कीर्तन तथा भजन सन्ध्या सञ्चालन भइरहेको छ। भक्तजनहरूले दुर्गा माताको आराधनासँगै भजन श्रवण गर्ने अवसर पाइरहेका छन् भने विभिन्न आकर्षक नृत्य, क्विज प्रतियोगिता तथा रमाइला र रोचक कार्यक्रमले पूजास्थलमा उत्साह थपेको छ। धार्मिक अनुष्ठान र मनोरञ्जनात्मक गतिविधिको संयोजनले बालबालिकादेखि ज्येष्ठ नागरिकसम्मलाई कार्यक्रममा सहभागी हुन प्रेरित गरेको आयोजकको भनाइ छ।
यस वर्षको पूजाका लागि २६ हजार रुपैयाँ मूल्य बराबरको दुर्गा माताको प्रतिमा रोहितबहादुर कार्कीले सौजन्य गर्नुभएको सचिव कडरियाले जानकारी दिनुभयो। प्रतिमा सौजन्यदेखि आर्थिक तथा व्यवस्थापकीय सहयोगसम्म स्थानीयवासीले देखाएको सक्रियताले सामूहिक धार्मिक आयोजनालाई थप सशक्त बनाएको छ।
पञ्चकन्या टोलमा आयोजना गरिएको दुर्गा पूजा कुनै एउटा टोलको कार्यक्रम मात्र नभई समग्र बिर्तामोडवासीको साझा धार्मिक तथा सांस्कृतिक उत्सव भएको उल्लेख गर्दै सचिव कडरियाले सम्पूर्ण धर्मानुरागी महानुभावलाई समय अनुकूल उपस्थित भई पूजाको शोभा बढाउन हार्दिक अपिल गर्नुभएको छ।
बडादसैँको आगमनसँगै दुर्गा माताको आराधना, भक्ति र श्रद्धाले मानिसको जीवनमा सकारात्मक ऊर्जा, शान्ति र सद्भावको सञ्चार गर्ने विश्वास व्यक्त गर्दै उहाँले भक्तजनलाई दुर्गा माताको चरणकमलमा शिर निहुराएर केही समय आध्यात्मिक साधना र भक्तिमा बिताउन आग्रह गर्नुभयो।
पूजालाई सफल बनाउन पञ्चकन्या कीर्तन मण्डलीका अध्यक्ष डिलीराम थपलिया, पञ्चकन्या टोल विकास समितिका अध्यक्ष टीका संग्रौला लगायत स्थानीय सामाजिक तथा धार्मिक व्यक्तित्वहरूको महत्वपूर्ण योगदान रहेको समितिले जनाएको छ।
धार्मिक आस्था, सामाजिक सद्भाव, ज्येष्ठ नागरिकप्रतिको सम्मान र सामूहिक सहकार्यलाई एउटै सूत्रमा जोड्दै पञ्चकन्यामा सञ्चालन भइरहेको दुर्गा पूजाले बडादसैँको उल्लासलाई थप जीवन्त बनाएको छ। स्थानीयस्तरमा धर्म, संस्कृति र सामाजिक एकताको सन्देश प्रवाह गर्दै आएको यस पूजाले आगामी दिनमा पनि समुदायलाई एकताबद्ध बनाउने अपेक्षा गरिएको छ।
